Ang Mabuting Balita at Repleksyon Miyerkules Disyembre 31 Ikapitong Araw ng Pagdiriwang sa Pasko ng Pagsilang: Juan 1:1-18

Mabuting Balita: Juan 1:1-18

Ang simula ng Mabuting Balita ng Panginoon ayon kay San Juan.

Sa pasimula pa’y naroon na ang Salita. Kasama ng Diyos ang Salita at ang Salita ay Diyos. Kasama na siya ng Diyos sa pasimula pa. Sa pamamagitan niya nilikha ang lahat ng bagay, at walang anumang nalikha nang hindi sa pamamagitan niya. Mula sa kanya ang buhay, at ang buhay ay siyang ilaw ng sangkatauhan. Nagliliwanag sa kadiliman ang ilaw, at hindi ito kailanman nagapi ng kadiliman.

Sinugo ng Diyos ang isang tao na nagngangalang Juan. Naparito siya upang magpatotoo tungkol sa ilaw at manalig sa ilaw ang lahat dahil sa patotoo niya. Hindi siya ang ilaw kundi naparito siya upang magpatotoo tungkol sa ilaw. Ang tunay na ilaw na tumatanglaw sa lahat ng tao ay dumarating sa sanlibutan.

Nasa sanlibutan ang Salita. Nilikha ang sanlibutan sa pamamagitan niya ngunit hindi siya nakilala ng sanlibutan. Naparito siya sa kanyang bayan ngunit hindi siya tinanggap ng kanyang mga kababayan. Ngunit ang lahat ng tumanggap at nanalig sa kanya ay pinagkalooban niya ng karapatang maging anak ng Diyos. Sila nga’y naging anak ng Diyos, hindi dahil sa isinilang sila ayon sa kalikasan, ni sa pita ng laman o sa kagagawan ng tao. Ang pagiging anak nila ay buhat sa Diyos.

Naging tao ang Salita at siya’y nanirahan sa piling natin. Nakita namin ang kanyang kapangyarihan at kadakilaan, puspos ng pag-ibig at katapatan. Tinanggap niya mula sa Ama ang kapangyarihan at kadakilaang ito bilang bugtong na Anak.

Nagpatotoo si Juan tungkol sa kanya. At ganito ang kanyang sigaw, “Siya ang tinutukoy ko nang aking sabihin, ‘Ang darating na kasunod ko’y higit sa akin, sapagkat siya’y siya na bago pa ako ipanganak.’”

Dahil sa siya’y puspos ng pag-ibig, tayong lahat ay tumanggap mula sa kanya ng abut-abot na kaloob. Sapagkat ibinibigay ang Kautusan sa pamamagitan ni Moises ngunit ang pag-ibig at ang katotohanan ay dumating sa pamamagitan ni Hesukristo. Kailanma’y walang nakakita sa Diyos, subalit ipinakilala siyang bugtong na Anak – siya’y Diyos – na lubos na minamahal ng Ama.

+ + + + + + +

Repleksyon:

May nagawa na ba tayo upang mailapit ang ating kapwa sa Panginoon?

Inilapit ni Juan ang mga tao sa Panginoon sa pamamagitan ng kanyang pamumuhay. Sa kanyang kababaang-loob, inihanda niya ang daan para kay Hesus. Inakay niya ang mga tao palapit kay Kristo, ngunit hindi niya hiniling na manatili sila sa kanya. Sa halip, itinuro niya si Hesus bilang ang Siyang dapat nilang sundan—hindi ang kanyang sarili. Ipinapaalala sa atin ng buhay ni Juan na ang ating misyon ay hindi upang ituon ang pansin sa ating sarili, kundi upang ihatid ang iba kay Hesus.

Tayo rin ba ay handang gumabay sa iba patungo kay Hesus sa pamamagitan ng ating pamumuhay? May lakas-loob at pagmamahal ba tayo upang marahang magsalita tungkol kay Hesus sa mga taong nakakasalamuha natin araw-araw? Kadalasan, hindi sa pamamagitan ng mabubulaklak salita o kahanga-hangang gawa natin naibabahagi ang pananampalataya, kundi sa simpleng pamumuhay na sumasalamin kay Kristo. Sa ganitong paraan, itinuturo na natin ang iba patungo sa Kanya.

May ilan sa atin ang nagsasabing, “Hindi ko tungkulin ang ibahagi si Hesus; para lamang ito sa mga taong naglilingkod sa Simbahan.” Ngunit sa bisa ng ating binyag, tayong lahat ay binigyan ng kapangyarihan at pananagutan na ibahagi si Hesus at ang ating pananampalataya sa abot ng ating makakaya. Ang tanong: naibahagi na ba talaga natin si Hesus at ang ating pananampalataya sa iba?

Hindi pa huli ang lahat. Habang tayo ay nabubuhay, nananatili ang ating tungkulin at misyon na ibahagi ang Panginoon. Huwag tayong matakot, sapagkat ang Panginoon ay laging kasama natin, at ang Espiritu Santo—na nagbibigay-buhay at kakayahan sa lahat ng bagay—ang patuloy na gumagabay sa atin.

Ngayong bisperas ng Bagong Taon, ay may inihahanda tayo sa ating mga hapag. Nawa’y ipaalala nito sa atin ang kahalagahan ng pagbabahagi sa mga nangangailangan. Hindi tayo magbibigay dahil hindi na natin kailagan, kundi mula sa taos-pusong pagnanais na magbahagi mula sa kaibuturan ng ating puso. Sa pamamagitan ng ating kabutihan, malasakit, at pagiging bukas-palad, ang mga nasa kadiliman at ang mga nawawalan ng pag-asa dahil sa bigat ng buhay ay makakita nawa ng liwanag ng Panginoon.

Sa pagtatapos ng taong ito at sa pagsisimula ng bago, tanungin natin ang ating sarili: Ang ating buhay ba ay nagtuturo sa iba patungo kay Hesus, o pinipili ba nating sarilinin Siya? At ano ang kongkretong hakbang na kaya nating gawin ngayon upang mailapit ang kahit isang kaluluwa sa Panginoon? — Marino J. Dasmarinas