Ang Mabuting Balita at Repleksyon Oktubre 9 Biyernes ng Ika-27 Linggo sa Karaniwang Panahon: Lucas 11:15-26

Mabuting Balita: Lucas 11:15-26

Noong panahong iyon, matapos palayasin ni Hesus ang isang demonyo, nanggilalas ang mga tao. Ngunit may ilan sa kanila ang nagsabi, “Si Beelzebul na prinsipe ng mga demonyo ang nagbigay sa kanya ng kapangyarihang magpalayas ng mga demonyo.” May iba namang nais siyang subukin, kaya’t nagsabi, “Magpakita ka ng kababalaghang magpapakilala na ang Diyos ang sumasaiyo.”

 Ngunit batid ni Hesus ang kanilang iniisip, kaya’t sinabi sa kanila, “Babagsak ang bawat kahariang nahahati sa magkakalabang pangkat at mawawasak ang mga bahay roon. Kung maghimagsik si Satanas laban sa kanyang sarili, paano mananatili ang kanyang kaharian? Sinasabi ninyong nagpapalayas ako ng mga demonyo sapagkat binigyan ako ni Beelzebul ng kapangyarihang ito.

Kung ako’y nagpapalayas ng mga demonyo sa pamamagitan ni Beelzebul, sino naman ang nagbigay ng kapangyarihan sa inyong mga tagasunod na makagawa ng gayun? Sila na rin ang nagpapatunay na maling-mali kayo. Ngayon, kung ako’y nagpapalayas ng mga demonyo sa pamamagitan ng kapangyarihan ng Diyos, nangangahulugang dumating na sa inyo ang paghahari ng Diyos.

 “Kapag ang isang taong malakas at nasasandatahan ay nagbabantay sa kanyang bahay, malayo sa panganib ang kanyang ari-arian. Ngunit kung salakayin siya at talunin ng isang taong higit na malakas, sasamsamin nito ang mga sandatang kanyang inaasahan at ipamamahagi ang ari-ariang inagaw. “Ang hindi panig sa akin ay laban sa akin, at nagkakalat ang hindi tumutulong sa kaing mag-ipon.

 “Kapag lumabas na mula sa tao ang isang masamang espiritu, ito’y gumagala sa mga tigang na lugar at naghahanap ng mapagpapahingahan. Kung walang matagpuan ay sasabihin nito sa sarili, ‘Babalik ako sa bahay na aking pinanggalingan.’ Pagbabalik ay matatagpuan niyang malinis na ang bahay at maayos. Kaya, lalabas siyang muli at magsasama ng pito pang espiritung masasama kaysa kanya, at papasok sila at maninirahan doon. Kaya’t sumasama kaysa dati ang kalagayan ng taong iyon.” 

+ + + + + + +

Repleksyon:

Maraming taon na ang nakalilipas, may isang patalastas sa telebisyon na may kaakit-akit na katagang ganito: “Our products are everywhere” o “Ang aming mga produkto ay matatagpuan kahit saan.” Maaari rin ba nating sabihin ang gayon tungkol kay satanas at sa kanyang mga kampon—na para bang nasa lahat sila ng dako sa ating panahon?

Nakalulungkot mang isipin, ang kasamaan ay nagpapakita ng sarili sa maraming kaakit-akit at mapanlinlang na anyo. Dahil dito, nagiging mahirap para sa atin na makilala ang presensiya nito at makita ang mga panganib na maaari nitong idulot sa ating buhay.

Maaaring hindi natin ito palaging namamalayan, ngunit ang tukso na gumawa ng masama ay maaari ring sumulpot sa ating kalooban. Kung minsan, bigla na lamang pumapasok sa ating isip ang masasamang kaisipan na nagtutulak sa atin na gumawa ng mga bagay na salungat sa kalooban ng Diyos.

Dapat ba tayong mabahala sa ganitong kalagayan? Dapat tayong maging mapagbantay, ngunit hindi tayo dapat magpadala sa takot. Ang pagkakaroon ng tukso ay hindi nangangahulugang nagkasala na tayo. Ang mahalaga ay kung paano natin ito haharapin. Tinatanggihan ba natin ang tukso at bumabaling kay Hesus, o pinapayagan natin itong manatili sa ating isip hanggang sa unti-unti tayong mailayo nito sa Kanya?

Nagkakaroon ng puwang ang kasamaan sa ating buhay kapag hinahayaan nating mapalayo tayo kay Hesus, napapabayaan ang ating ugnayan sa Kanya, at nanghihina ang ating pananampalataya. Kapag nagiging kampante tayo sa ating buhay-panalangin, napapabayaan ang Salita ng Diyos, at higit nating pinahahalagahan ang mga makamundong pagnanasa kaysa sa ating ugnayan kay Kristo, mas nagiging madali para sa atin ang mahulog sa tukso.

Unti-unti, maaari tayong makagawa ng mga pasiyang lalo namang maglalayo sa atin sa Diyos. Kaya mahalagang suriin natin palagi ang ating mga puso at itanong sa ating sarili: Naipakikita ba sa ating mga iniisip, sinasabi, at ginagawa ang presensiya ni Hesus sa ating buhay?

Ipinapaalala sa atin ng Ebanghelyo ngayong Biyernes na higit na makapangyarihan si Hesus kaysa kay satanas. Gaano man katuso ang kasamaan at gaano man kaakit-akit ang mga tuksong iniaalok nito, hinding-hindi nito matatalo ang kapangyarihan ni Kristo. May kapangyarihan si Hesus na gapiin si satanas at palayain tayo mula sa pagkaalipin sa kasalanan.

Gayunman, inaanyayahan din Niya tayong makipagtulungan sa Kanyang biyaya, sapagkat pinagkalooban Niya tayo ng kalayaang pumili. Nasa atin ang pagpapasiya kung yayakapin natin Siya, bubuksan ang ating puso sa Kanya, at susunod sa Kanyang mga aral, o hahayaan nating iligaw tayo ng mga tukso ng mundong ito.

Nasa atin ang pagpili. Piliin natin si Hesus sa halip na ang dimonyo, gaano man kaakit-akit ang mga tuksong dumarating sa ating buhay. Talikuran natin ang kasalanan at iwasan ang mga nakagawian, sitwasyon, at pagnanasang naglalayo sa atin sa Diyos. Patatagin natin ang ating ugnayan kay Hesus sa pamamagitan ng panalangin, pakikibahagi sa Banal na Misa, pagtanggap sa mga Sakramento, at araw-araw na pagsasabuhay ng ating pananampalataya.

Sa mga sandaling nanghihina tayo, alalahanin nating hindi natin kailangang harapin nang mag-isa ang ating mga espirituwal na pakikipaglaban. Maaari tayong lumapit kay Hesus anumang oras, humingi ng Kanyang biyaya, at magtiwala sa Kanyang kapangyarihang tulungan tayong mapagtagumpayan ang ating mga kahinaan.

Maaaring napakaraming tukso sa mundong ating ginagalawan, ngunit hindi nangangahulugang kailangan nating magpadaig sa mga ito. Maaaring tayo ay matisod at mahulog paminsan-minsan, ngunit kung buong pagpapakumbaba tayong manunumbalik kay Hesus at taos-pusong nanaising magbago, maaari tayong bumangon muli sa tulong ng Kanyang biyaya. 

Ang mahalaga ay huwag nating hayaang ang kasalanan ang magkaroon ng huling kapangyarihan sa ating buhay. Patuloy nating buksan ang ating mga puso kay Hesus at hayaan Siyang gumabay sa ating mga pasiya, magpatatag sa ating pananampalataya, at humubog sa atin upang maging mga taong nais Niyang maging tayo.

Kaya ngayon, buong katapatan nating suriin ang ating mga puso: Hinahayaan ba nating ilayo tayo kay Hesus ng mga kaakit-akit na tukso ng dimonyo, o buong tapang nating pinipili si Kristo kahit hinihingi Niyang talikuran natin ang mga kasalanang kinagigiliwan natin at baguhin ang ating pamumuhay?

Kung tunay nating minamahal si Hesus, handa ba tayong patunayan ang pagmamahal na iyon sa pamamagitan ng pagtalikod sa kasalanan at pagpili sa Kanya araw-araw—kahit masakit, kahit mahirap, at kahit nangangahulugan ito ng pagsuko sa mga bagay na ayaw nating bitiwan?— Marino J. Dasmarinas