Ang Mabuting Balita at Repleksyon Hulyo 28 Martes ng Ika-17 Linggo sa Karaniwang Panahon: Mateo 13:36-43

Mabuting Balita: Mateo 13:36-43

Noong panahong iyon, iniwan ni Hesus ang mga tao at pumasok sa bahay. Lumapit ang kanyang mga alagad at sinabi sa kanya, “Ipaliwanag po ninyo sa amin ang talinghaga tungkol sa masasamang damo sa bukid.”  

Ito ang tugon ni Hesus, “Ang Anak ng Tao ang naghahasik ng mabuting binhi. Ang bukid ay ang sanlibutan. Ang mga taong pinaghaharian ng Diyos ang mabuting binhi at ang mga taong pinaghaharian ng diyablo ang masasamang damo. Ang kaaway na naghasik ng mga iyon ay walang iba kundi ang diyablo. Ang pag-aani ay ang katapusan ng daigdig, at ang mga anghel ang mga tagapag-ani.  

Kung paanong iniipon ang mga damo at sinusunog, gayun din ang mangyayari sa katapusan ng daigdig. Susuguin ng Anak ng Tao ang kanyang mga anghel, at iipunin nila mula sa kanyang pinaghaharian ang lahat ng nagiging sanhi ng pagkakasala at ang lahat ng gumagawa ng masama, at ihahagis sa maningas na pugon.

Doo’y mananangis sila at magngangalit ang kanilang ngipin. At magliliwanag na parang araw ang mga matuwid sa kaharian ng kanilang Ama. Ang may pandinig ay makinig!”

+ + + + + + +   

Repleksyon:

May isang kuwento tungkol sa isang makasalanang tao na biglang namatay. Agad siyang dinala ng dimonyo sa nag-aapoy nitong kaharian. Siya ay umiiyak at nagpupumiglas pero wala na siyang nagawa upang baguhin ang kanyang hantungan.

Kung sana'y nagsisi siya sa kanyang mga kasalanan. Kung sana'y pinakinggan niya ang mapagmahal na payo ng kanyang mga mahal sa buhay na magbagong-buhay at lumapit sa Diyos, hindi sana siya nauwi sa impiyerno.

Ang kuwentong ito ay paalala sa ating lahat na ang bawat araw na ipinagkakaloob sa atin ay isang biyaya at isang pagkakataong piliin ang Diyos. Habang tayo ay nabubuhay, bukas pa rin ang Kanyang awa at pagmamahal.

Hindi Siya nagsasawang tawagin tayo sa pagsisisi, kapatawaran, at sa isang buhay na sumasalamin sa Kanyang kabutihan. Patuloy Niyang itinatanim sa ating mga puso ang mabubuting binhi ng pananampalataya, pag-asa, pag-ibig, at kabanalan.

May dalawang magkasalungat na kapangyarihan sa mundong ito: ang Diyos at si Satanas. Ang Diyos ay patuloy na naghahasik ng mabubuting binhi sa ating mga puso, samantalang si Satanas ay naghahasik ng mga damo at tukso. Mula ng tayo ay ipinaglihi hanggang sa ating huling hininga, iisa lamang ang hangarin ng Diyos—ang akayin tayo sa landas ng biyaya at buhay na walang hanggan.

Ngunit habang tayo ay naglalakbay sa buhay, hindi tumitigil si Satanas sa pag-aalok ng mga tukso at mapanlinlang na pangako upang ilayo tayo sa Diyos. Kapag tayo ay nagpadaig sa mga ito, unti-unti tayong inilalayo sa Kanya at inilalapit sa kapahamakan.

Ang kasalanan ay maaaring magbigay ng panandaliang kasiyahan, ngunit ninanakaw nito ang tunay na kapayapaan, kagalakan, at buhay na tanging si Hesus lamang ang makapagbibigay.

Kaya't talikuran natin ang kasalanan at ang anumang naglalayo sa atin sa Diyos. Iwaksi natin ang mga panlilinlang ng diyablo at yakapin natin ang Panginoon nang may buong pagtitiwala at katapatan.

Kahit na ang pagsunod kay Jesus ay nangangailangan ng sakripisyo, pagtitiis, at katatagan, patuloy tayong lumakad sa Kanyang mga yapak, sapagkat Siya ang Daan, ang Katotohanan, at ang Buhay—ang landas na umaakay sa atin patungo sa buhay na walang hanggan.

Ngayong araw, anyayahan natin ang Espiritu Santo na siyasatin ang ating mga puso. Hinahayaan ba nating lumago ang mabubuting binhing itinanim ng Diyos sa atin, o pinahihintulutan nating manaig ang mga damo ng kasalanan?

Habang patuloy pang iniaalok ng Panginoon ang Kanyang awa, nawa'y huwag nating ipagpaliban ang ating pagbabalik-loob. Sama-sama tayong mamuhay nang tapat kay Kristo at akayin din natin ang iba patungo sa Kanya.

Kapag dumating ang sandaling tawagin tayo ng Panginoon, magiging handa kaya ang ating mga puso na salubungin Siya at marinig ang Kanyang tinig na nagsasabing, "Halika, pumasok kana sa kaharian ng iyong Panginoon"?—Marino J. Dasmarinas