Mabuting Balita: Lucas 9:43b-45
Noong panahong iyon, samantalang nanggigilalas ang mga tao sa lahat ng ginawa ni Hesus, sinabi niya sa kanyang mga alagad, “Tandaan ninyo itong sasabihin ko: ipagkakanulo ang Anak ng Tao.”
Ngunit hindi nila ito naunawaan, pagkat inilingid ito sa kanila. Nangangamba naman silang magtanong sa kanya kung ano ang ibig sabihin niyon.
+ + + + + + +
Repleksyon:
Nahihirapan ba tayong unawain ang mga paraan ng pagkilos ng Panginoon sa ating buhay? Marahil ay bawat isa sa atin ay nakararanas ng ganitong uri ng pagsubok.
Halimbawa, tinatanong natin ang Diyos kapag dumaraan tayo sa mabibigat na hamon ng buhay. Ang ilan sa atin ay maaaring magsabi sa harap ni Jesus: “Bakit ko kailangang pagdaanan ang hirap na ito sa aking buhay gayong sumusunod naman ako sayo?”
Kapag dumaraan tayo sa ganitong mga pagsubok, kailangan nating alalahanin na tayo ay nilikhang nilalang ng Diyos na may hangganan ang kaisipan. Bilang mga tao, limitado ang ating pag-unawa gaano man katalino ang ilan sa atin.
Kaya’t hinding-hindi natin lubos na mauunawaan ang mga paraan ng Diyos. Sa halip, tinatawag Niya tayo na magpakumbaba, magpasakop sa Kanyang kalooban, at mahigpit na kumapit sa ating pananampalataya sa ating walang hanggang at mapagmahal na Diyos.
Kaya’t kapag dumaraan tayo sa mga yugto ng buhay na tila mahirap unawain, huwag tayong matakot na sumigaw at magtanong sa Diyos: “Bakit namin kailangang pagdaanan ang pagsubok na ito?”
Subalit matapos tayong magtanong, lalo pa sana tayong kumapit sa ating pananampalataya at patuloy na maniwala na may dakilang layunin ang Diyos kung bakit Niya hinahayaan tayong lumakad sa ganitong daan sa ating buhay. Sapagkat sa bawat paghihirap ay hinuhubog Niya tayo, pinatitibay, at lalo Niya tayong inilalapit sa Kanyang sarili.
Hahayaan ba nating talunin tayo ng mga pagsubok o gagamitin natin ang ating mga pagsubok upang lalo pang tumibay ang ating pagtitiwala sa Panginoon? – Marino J. Dasmarinas
No comments:
Post a Comment