Ang Mabuting Balita at Repleksyon Pebrero 23 Lunes sa Unang Linggo ng Kuwaresma: Mateo 25:31-46

Mabuting Balita: Mateo 25:31-46

Noong panahong iyon, sinabi ni Hesus sa kanyang mga alagad: "Darating ang Anak ng Tao bilang Hari, kasama ang lahat ng anghel, at luluklok sa kanyang maringal na trono. Sa panahong iyon, matitipon sa harapan niya ang lahat ng tao. Sila'y pagbubukud-bukurin niya, tulad ng ginagawa ng pastol sa mga tupa at mga kambing. Ilalagay niya sa kanyang kanan ang mga tupa, at sa kaliwa ng mga kambing. 

At sasabihin ng Hari sa mga nasa kanan, 'Halikayo, mga pinagpala ng aking Ama! Pumasok na kayo at manirahan sa kahariang inihanda para sa inyo mula pa nang likhain ang sanlibutan. Sapagkat ako'y nagutom at inyong pinakain, nauhaw at inyong pinainom. Ako'y isang dayuhan at inyong pinatuloy. ako'y walang maisuot at inyong pinaramtan, nagkasakit at inyong dinalaw; ako'y nabilanggo at ako'y inyong pinuntahan.' 

Sasagot ang mga matuwid, 'Panginoon, kailan po namin kayo nakitang nagutom at aming pinakain, o nauhaw at aming pinainom? Kailan po kayo naging dayuhan at aming pinatuloy, o kaya'y walang maisuot at aming pinaramtan? At kailan po namin kayo nakitang may sakit o nasa bilangguan at aming dinalaw?' Sasagutin ng Hari, 'Sinasabi ko sa inyo: nang gawin ninyo ito sa pinakahamak sa mga kapatid kong ito, ito ay sa akin ninyo ginawa.'

"At sasabihin naman niya sa mga nasa kaliwa, 'Lumayo kayo sa akin, mga sinumpa! kayo'y pasa-apoy na di-mamamatay, na inihanda para sa diyablo at sa kanyang mga kampon. Sapagkat ako'y nagutom at hindi ninyo pinakain, nauhaw at hindi ninyo pinainom. Ako'y naging isang dayuhan at hindi ninyo pinatuloy; ako'y nawalan ng maisuot at hindi ninyo pinaramtan, ako'y may sakit at nasa bilangguan at hindi ninyo dinalaw.' 

At sasagot din sila, 'Panginoon, kailan po namin kayo nakitang nagutom, nauhaw, naging dayuhan, nawalan ng maisuot, may sakit o nasa bilangguan, at hindi namin kayo pinaglingkuran?' At sasabihin sa kanila ng Hari, 'Sinasabi ko sa inyo: nang pinagkaitan ninyo ng tulong ang pinakahamak sa mga ito, ako ang inyong pinagkaitan.' Itataboy ang mga ito sa kaparusahang walang hanggan, ngunit ang mga matuwid ay tatanggap ng buhay na walang hanggan."

+ + + + + + +

Repleksyon:

Nasa ating mga puso na ba si Jesus ngayon?

Kung oo ang ating sagot, dapat makita sa ating buhay ang Kanyang presensya. Kung tunay Siyang nananahan sa atin, hindi tayo maaaring manatiling ganon pa rin na namumuhay sa kadiliman at kasamaan.

Tinatawag Niya tayong maging mahabagin, maging mapagkumbaba, at magkaroon ng pusong may malasakit sa mahihirap at mga kinalimutan ng lipunan. Ang mga katangian na ito ay patunay na si Jesus ay buhay sa atin. Sapagkat Siya ay laging mahabagin, laging mapagkumbaba, at hindi mapanghusga. Inakap Niya ang makasalanan, itinayo ang mga nadapa, at ibinalik ang pag-asa sa mga nawawala.

Ang Kaharian ni Kristo ay hindi lamang pangako sa hinaharap—ito ay naririto na, ngayon. Nagsisimula ito sa ating puso. Lumalago ito sa ating isipan. At nahahayag ito sa ating mga gawa. Sa tuwing pinipili nating magmahal tulad ng Kanyang pagmamahal, hinahayaan nating mag-ugat ang Kanyang Kaharian sa atin.

Nagiging totoo ang Kanyang Kaharian kapag pinapakain natin ang nagugutom at pinaiinom ang nauuhaw. Nakikita ito kapag tinatanggap natin ang mga dayuhan at binubuksan hindi lamang ang ating mga pintuan kundi pati ang ating mga puso.

Nagliliwanag ito kapag inaalagaan natin ang mga maysakit at dinadalaw ang mga bilanggo—maging sila man ay nakakulong sa rehas o sa kalungkutan, takot, at kawalan ng pag-asa. At higit itong nagiging makapangyarihan kapag tayo ay nagpapatawad—kapag pinipili nating palayain ang ating sarili mula sa sugat ng galit at magpakita ng awa sa halip na paghihiganti.

Sa bawat munting gawa ng pag-ibig, ipinahahayag natin na si Jesus ang Hari ng ating buhay. Sa bawat kilos ng habag, ipinadarama natin na ang Kanyang Kaharian ay naghahari sa atin. Kapag ganito tayo namumuhay, hindi lamang natin Siya ipinapangaral—ginagawa natin Siyang buhay at nakikita sa ating mundo.

Kaya muli nating tanungin ang ating sarili: Si Jesus ba ay tunay na naghahari sa ating buhay?

Kung Siya nga ang ating Hari, nakikita ba ng iba ang Kanyang habag sa ating mga salita, ang Kanyang kababaang-loob sa ating mga kilos, at ang Kanyang awa sa ating pagpapatawad?

Papayag ba tayong maging daluyan ng Kanyang Kaharian upang sa pamamagitan natin ay maranasan Siya ng iba? —Marino J. Dasmarinas