Ang Mabuting Balita at Repleksyon sa Lunes Nobyembre 24 Paggunita kay San Andres Dung-lac, pari at mga kasama, mga martir: Lucas 21:1-4

Mabuting Balita: Lucas 21:1-4

Noong panahong iyon, nang tumingin si Hesus, nakita niya ang mayayamang naghuhulog ng kanilang kaloob sa lalagyan nito sa templo. Nakita rin niya ang isang dukhang babaing balo na naghulog ng dalawang kusing.

Ang wika ni Hesus, “Sinasabi ko sa inyo: ang dukhang balong iyon ay naghulog nang higit kaysa kanilang lahat. Sapagkat bahagi lang ng di na nila kailangan ang kanilang ipinagkaloob, ngunit ibinigay ng balong iyon na dukhang-dukha ang buo niyang ikabubuhay.”

+ + + + + + +

Repleksyon:

Tayo ba ay nagbibigay nang boung puso?

Si Jesus, sa ating Mabuting Balita, ay pumabor sa kagandahang-loob ng dukhang balo sapagkat ang kanyang handog ay nagmula sa kaibuturan ng kanyang puso. Walang anumang kapalit ang kanyang pagbibigay; hindi ito nagmula sa kanyang sobrang pera. Ibinigay niya ang kakaunti mayroon siya dahil lubos siyang nagtitiwala sa kabutihan ng Diyos.

Inaanyayahan din tayo ng Mabuting Balitang ito na suriin ang ating mga sarili—hindi lamang kapag nagbibigay tayo sa ating simbahan, kundi sa tuwing tumutulong tayo sa sinuman na nangangailangan. Inaanyayahan din tayong pagnilayan ang ating motibo sa pagbibigay: Nagbibigay ba tayo mula sa pag-ibig, malasakit, at pananampalataya? O nagbibigay tayo dahil nakasanayan, dahil madali, o dahil may nais tayong kapalit o papuri?

Ang tunay na pagbibigay ay yaong nagmumula sa puso. Hindi mahalaga ang halaga ng ibinibigay natin; ang tunay na mahalaga ay nagmumula ito sa tapat na pag-ibig natin sa Diyos at sa kapwa. Sa Mabuting Balita, hindi lamang ang balo ang nagbigay—mayayamang tao rin ang naghandog. Ngunit mas natuwa si Jesus sa pagbibigay ng balo dahil ito ay dalisay, tapat, at walang halong pansariling interes.

Anuman ang ibinibigay natin mula sa puso ay ibinabalik sa atin nang masagana—hindi lamang sa materyal na bagay, kundi sa espiritual na yaman, kapayapaan ng loob, at isang mas malalim na karanasan ng pag-ibig ng Diyos. Sa Lucas kabanata anim, talatang tatlumpu’t walo (6:38), sinabi ni Jesus: “Magbigay kayo at kayo’y bibigyan, at tatanggap kayo ng takalang siksik, liglig, umaapaw. Sapagkat kung anong panukat ang inyong ginagamit ay siya ring gagamitin sa inyo.”

Habang nagpapatuloy tayo sa ating paglalakbay ng pananampalataya, nawa’y matutunan nating magbigay hindi mula sa ating sobra, kundi mula sa ating pag-ibig. Nawa’y maialay natin hindi lamang ang madaling ibigay, kundi ang mga bagay na tunay na sumasalamin sa ating pasasalamat, pagpapakumbaba, at pagtitiwala sa Diyos.

Anong uri kaya ng tagapagbigay ang nakikita ni Jesus sa atin? – Marino J. Dasmarinas