Ang Mabuting Balita at Repleksyon sa Nobyembre 16 Ika-33 Linggo ng Karaniwang Panahon: Lucas 21:5-19

Mabuting Balita: Lucas 21:5-19

Noong panahong iyon, pinag-uusapan ng ilan sa mga tao ang templo -- ang kahanga-hangang mga bato na ginamit dito at ang mga palamuti nito na inihandog ng mga tao. Kaya't sinabi ni Jesus, "Darating ang panahong lahat ng nakikita ninyong iyan ay iguguho, walang batong ititira sa ibabaw ng kapwa bato." 

Tinanong nila si Jesus, "Guro, kailan po ito mangyayari? At ano ang magiging palatandaan na ito'y magaganap na?"

Sumagot siya, "Mag-ingat kayo ng hindi mailigaw ninuman! Sapagkat marami ang darating sa aking pangalan na magsasabi, 'Ako ang Mesias!' at, 'Dumating na ang panahon!' Huwag kayong susunod sa kanila. 

Huwag kayong mabagabag kung makakita kayo ng mga digmaan at mga himagsikan. Dapat mangyari ang mga ito, ngunit hindi darating kara-karaka ang wakas." At sinabi pa niya, "Makikipagdigma ang bansa laban sa kapwa bansa at ang kaharian laban sa kapwa kaharian. Magkakaroon ng malalakas na lindol, magkakagutom at magkakasalot sa iba't ibang dako. May lilitaw na mga kakila-kilabot na mga bagay at mga kagila-gilalas na tanda buhat sa langit. 

"Ngunit bago mangyari ang lahat ng ito, darakpin kayo't uusigin. Kayo'y dadalhin sa mga sinagoga upang litisin at ipabilanggo. At dahil sa akin ay ihaharap kayo sa mga hari at mga gobernador. Ito ang pagkakataon ninyo upang magpatotoo tungkol sa akin.

Ipanatag ninyo ang inyong kalooban, huwag kayong mababalisa tungkol sa pagtatanggol sa inyong sarili, sapagkat bibigyan ko kayo ng katalinuhan at nang pananalitang hindi kayang tutulan o pabulaanan ng sinuman sa inyong mga kaaway. 

Ipagkakanulo kayo ng inyong mga magulang, mga kapatid, mga kamag-anak, at mga kaibigan. At ipapapatay ang ilan sa inyo. Kapopootan kayo ng lahat dahil sa akin. ngunit hindi mawawala ni isang hibla ng inyong buhok. Sa inyong pagtitiis ay tatamuhin ninyo ang buhay na walang hanggan.

+ + + + + + +

Repleksyon:

May isang kuwento tungkol sa isang lalaki na araw-araw ay nabubuhay na pasan ang bigat ng pagdududa, takot, at pag-aalala. Wala nang ibang laman ang kanyang isip kundi ang tatlong ito. Isang araw, tinanong siya ng isang kaibigan kung naniniwala siya sa Diyos.

Sumagot siya, “Hindi, hindi ako naniniwala sa Diyos.” Nang tanungin kung bakit, sinabi niya, “Dahil wala pang nagpakilala sa akin sa Diyos na sinasabi ninyo, at wala pang nagsabi sa akin ng kahit ano tungkol sa Kanya.”

Malapit sa kanilang dalawa ay ang isa pa nilang kaibigan na si Jessie, isang masigasig at nagsasabuhay na Katoliko, na narinig ang kanilang pag-uusap. Naantig ang kanyang puso kaya nilapitan niya ang lalaking balisa at tinanong kung maaari siyang maglaan ng isang oras tuwing Linggo ng gabi, upang maibahagi niya rito si Jesus at ang kanyang pananampalatayang Katoliko. Sagot ng lalaki, “Oo, maaari kong ibigay sa iyo ang isang oras—o baka higit pa sa isang oras. Simulan na natin ito sa lalong madaling panahon.”

At ganoon nga ang nangyari: isang Linggo, bumisita si Jessie sa bahay ng kaibigan at ibinahagi ang lahat ng kanyang nalalaman tungkol kay Jesus at sa pananampalatayang Katoliko. Masigasig na nakinig ang lalaki; inisip niya ang bawat salita, at hindi nagtagal, isang malalim na pagkauhaw kay Jesus ang sumibol sa kanyang puso.

Nagsimula siyang magbasa ng mga aklat tungkol kay Jesus at sa Simbahang Katolika, at ang paglalakbay na ito ay nagdala sa kanya sa Sakramento ng Binyag. Pagkatapos mabinyagan, ang takot at pag-aalalang matagal nang nananahan sa kanyang buhay ay nawala. Hindi na siya katulad ng dati, sapagkat si Jesus ay naninirahan na sa kanyang puso.

Sa ating Mabuting Balita, nagsasalita si Jesus tungkol sa mga huling araw—ipinapaalala Niya sa atin ang kawalang kasiguruhan ng buhay, ang paglipas ng mga materyal na bagay, at maging ang kamatayan. Gayunman, sa gitna ng mga nakakatakot na larawang ito, puno ng pagmamahal Niyang sinasabi sa atin na huwag tayong matakot, sapagkat Siya mismo ang mag-iingat sa atin.

Maraming  tao ngayon ang tila nakararanas ng tila ba “katapusan” sa kanilang buhay. Marami sa paligid natin ang nakararanas ng kawalan ng pag-asa, pagkabalisa, at kadiliman sa kalooban. At ano ang ugat ng kanilang paghihirap? Hindi pa nila nakikilala ang Isang— Jesus—na nagliligtas, nagmamahal, nagpapagaling, umaakay, at nagbibigay ng kapayapaang hindi kayang ipaliwanag ng mundo.

Bilang mga tagasunod ni Kristo, tinatawag tayong ibahagi si Jesus sa buhay ng mga hindi pa Siya nakikilala. Inaanyayahan tayong maging tulad ni Jessie—magpakilala ng Panginoon sa iba, makipaglakbay sa kanila nang may pasensya, pagmamahal, at kababaang-loob. Marami nang buhay ang nabago dahil may isang taong nagmalasakit na magbahagi tungkol kay Jesus. Ngunit marami pa rin sa ating paligid ang ligaw, balisa, at nauuhaw kay Jesus.

Kaya kailangan nating kumilos. Kailangan nating magmahal, magsalita nang may kabaitan, at sumaksi nang tapat—nang hindi natatakot sa maaaring kahihinatnan. Sapagkat sinabi mismo ni Jesus: “Kapopootan kayo ng lahat dahil sa Aking pangalan, ngunit walang isang buhok man sa inyong ulo ang mawawala. Sa pamamagitan ng inyong pagtitiyaga ay makakamtan ninyo ang kaligtasan.”(Lucas 21:17–19) – Marino J. Dasmarinas