Ang Mabuting Balita at Repleksyon sa Oktubre 13 Lunes sa Ika-28 Linggo ng Karaniwang Panahon: Lucas 11:29-32

Mabuting Balita: Lucas 11:29-32

Noong panahong iyon, samantalang dumaragsa ang mga tao, sinabi ni Hesus, “Napakasama ng lahing ito! Naghahanap sila ng palatandaan mula sa langit, subalit walang ipapakita sa kanila maliban sa palatandaang inilalarawan ng nangyari kay Jonas. Kung paanong naging isang palatandaan si Jonas sa mga taga-Ninive, gayun din naman, magiging isang palatandaan sa lahing ito ang Anak ng Tao.

Sa Araw ng Paghuhukom, titindig ang Reyna ng Timog laban sa lahing ito at sila’y hahatulan niya ng kaparusahan. Sapagkat nanggaling siya sa dulo ng daigdig upang pakinggan ang karunungan ni Solomon; ngunit higit na di-hamak kay Solomon ang naririto! Sa Araw ng Paghuhukom ay titindig ang mga taga-Ninive laban sa lahing ito at hahatulan ng kaparusahan, sapagkat nagsisi sila dahil sa pangangaral ni Jonas; ngunit higit na di-hamak kay Jonas ang naririto!”

+ + + + + + +

Repleksyon:

Bakit ba paminsan-minsan ay may dumadaan na mga mabubuti at maka-Diyos na tao sa ating buhay? Hindi ito isang pagkakataon lamang. Laging may mabuting dahilan kung bakit sila ipinapadala ng Diyos sa ating buhay—ito ay bahagi ng Kanyang banal na layunin.

Halimbawa, kapag tayo ay naging kaibigan ng isang mabuti at maka-Diyos na tao, ibig sabihin ay inilapit tayo ng Diyos sa kanila upang tayo rin ay lumago sa kabutihan at kabanalan. Hindi natin sila nakilala upang dalhin tayo sa kasamaan, kundi upang dalhin tayo sa kabutihan. Si Jesus mismo ang naglalagay ng ganitong mga tao sa ating landas upang mapalambot ang ating mga puso at magkaroon ng panibagong buhay sa piling Niya.

Marami sa atin ang nakikinig at nagpapahintulot na impluwensyahan ng ating mga maka-Diyos na kaibigan. Dahil dito, tayo ay unti-unting nagiging mas mabuti at mas malapit kay Kristo. Subalit sa kasamaang palad, hindi ito ang laging nangyayari. Marami pa rin ang pinipiling baliwalain at sadyang maging bingi sa tawag ng Diyos. Kahit gaano pa karaming beses Niya tayong tawagin sa pagbabago, nananatili pa rin ang matitigas na puso at ang pagtanggi sa Kanyang tinig.

Tulad ni Jonas sa ating Mabuting Balita, siya ay isinugo ng Diyos sa mga taga-Ninive upang sila ay tawagin sa pagsisisi. Nakinig sila, kaya’t sila ay pinatawad at iniligtas ng Diyos sa parusa. Pagkatapos ni Jonas, marami pang mga propeta ang isinugo upang manawagan ng pagbabalik-loob sa Panginoon.

Nang dumating si Jesus, itinuloy Niya ang panawagang ito. Marami ang nakinig sa Kanya at lubos na nagbago ang buhay. Ngunit marami rin ang binalewala ang Kanyang tinig, at patuloy na niyakap ang kasalanan.

Ngunit hindi natapos ang panawagan ni Jesus sa panahon ng Kanyang ministeryo. Ang Kanyang tinig ay patuloy na dumadaloy hanggang sa ating panahon ngayon—tayo na ang Kanyang tinatawag sa pagbabalik-loob, pagsisisi, at pagbabagong buhay.

Ginagamit ng Diyos ang mga mabubuti at maka-Diyos na tao bilang Kanyang mga kasangkapan ng biyaya upang gisingin ang ating mga puso at akayin tayo palapit sa Kanya. Ang tunay na tanong ngayon ay hindi kung tinatawag ba tayo ng Diyos—sapagkat tiyak na tinatawag nya tayo—kundi kung tayo ba ay handang makinig at tumugon.

Makikikinig ba tayo sa Diyos na nagpapadala ng mga tao sa ating buhay upang tayo ay mas mapalapit sa kanya o magbibingi-bingihan parin tayo? — Marino J. Dasmarinas