Ang Mabuting Balita para sa Agosto 27 Biyernes Santa Monica (Paggunita): Mateo 25:1-13

Mabuting Balita: Mateo 25:1-13

Sinabi ni Jesus sa kanyang mga alagad, 1 Tinutukoy ng kuwentong ito ang mangyayari sa kaharian ng Langit. Sampung abay na dalaga ang lumabas na may dalang lampara para sumalubong sa lalaking ikakasal. 2 Hangal ang lima sa kanila, at matalino naman ang lima pa. 

3 Dinala ng mga hangal na abay ang kanilang mga lampara nang walang reserbang langis. 4 Ngunit dinala naman ng matatalino ang kanilang mga lampara na may reserbang langis. 5 Natagalan ang lalaking ikakasal kaya inantok silang lahat at nakatulog.  

6 Ngunit nang hatinggabi na, may tumawag: ‘Dumarating na ang lalaking ikakasal; lumabas kayo at salubungin siya!’ 7 Nagising silang lahat noon at inihanda ang kanilang mga lampara. 8 Sinabi ng mga hangal sa matatalino: ‘Bigyan naman ninyo kami ng inyong langis dahil mahina na ang ningas ng aming mga lampara.’ 9 Sumagot ang matatalino: ‘Baka kulangin ang langis para sa amin at para sa inyo. Mabuti pang pumunta kayo sa mga nagtitinda at bumili para sa inyo.’  

10 Nakaalis na sila para bumili nang dumating ang lalaking ikakasal; ang mga handa na ay sumama sa lalaking ikakasal sa kasalan, at isinara ang pinto. 11 Pagkatapos ay saka dumating ang iba pang mga dalaga at tumawag: ‘Panginoon, Panginoon, pagbuksan kami!’ 12 Ngunit sumagot siya: ‘Talagang sinasabi ko sa inyo: hindi ko kayo kilala.’ 13 Kaya magbantay kayo sapagkat hindi ninyo alam ang araw o ang oras.’