Ang Mabuting Balita at Repleksyon para sa Marso 3, Ika-8 na Linggo sa Karaniwang Panahon: Lucas 6:39-45

Mabuting Balita: Lucas 6:39-45

39 Sinabi ni Jesus sa kanyang mga alagad ang isang talinhaga: “Puwede nga kayang akayin ng isang bulag ang isa pang bulag? Di ba’t kapwa sila mahuhulog sa kanal? 40 Hindi higit sa kanyang guro ang alagad. Magiging katulad ng kanyang guro ang ganap na alagad.

41 Bakit mo tinitingnan ang puwing sa mata ng iyong kapatid? At di mo pansin ang troso sa iyong mata. 42 Paano mo masasabi sa iyong kapatid: ‘Kapatid, pahintulutan mong alisin ko ang puwing sa mata mo,’ gayong hindi mo nga makita ang troso sa mata mo? Mapag­kunwari! Alisin mo muna ang troso sa mata mo, at saka ka makakakitang mabuti para alisin ang puwing sa mata ng kapatid mo.

43 Hindi makapamumunga ng masa­ma ang mabuting puno, at ang masamang puno nama’y hindi maka­pa­mumu­nga ng mabuti. 44 Nakikilala ang ba­wat puno sa bunga nito. Hindi makapi­pitas ng igos mula sa tinikan ni maka­aani ng ubas mula sa dawagan. 45 Nag­lalabas ang taong mabuti ng mabuting bagay mula sa yaman ng kabutihan sa kanyang puso; ang masama nama’y naglalabas ng ma­sa­mang bagay mula sa kanyang kasamaan. At sinasabi nga ng bibig ang uma­apaw mula sa puso.

Ang Mabuting Balita ng Panginoon   

+ + + + + + +

Repleksyon:

May isang babae na nakakita ng isang guapong lalaki. Nang mapansin ng lalaki na tinitingnan siya ng babae ay tumingin din siya sa babae. Nag panagpo ang kanilang mga mata at ang babae ay kaagad agad na umibig sa lalake. Pagkalipas ng ilang lingo sila ay nag pakasal ngunit pagkatapos ng ilang buwan ay unti-unting lumabas ang hindi mabuting pag-uugali ng lalake.

Madali ka bang mabighani ng panlabas na kaanyuan? Halimbawa ay may nakita ka na magandang babae o guapong lalake at ika’y kaagad na humanga sa kanya. Kaya ang nangyari ay ibinigay mo kaagad ang iyong puso sa kanya. Ang panlabas na kaanyuan kadalasan ay hindi totoo. Bakit? Dahil hindi natin lubos na makikilala ang tao sa pamamagitan lamang ng kanyang anyong panlabas.

Ang anyong panlabas ay isang pakitang tao lamang. Ang panlabas na anyo ay hindi ang tunay na kulay o ugali ng isang tao. Dahil ang tunay na kulay at ugali ay nasa puso at ito ay atin lamang malalaman pag mas nakilala na natin ng ang isang tao.

Sa ating modernong panahon ngayon ay maraming kabataan ang akaagad-agad ng nasisilo ng panlabas na anyo. Ito ang nagiging instrumento para mabighani sila sa kanilang magiging asawa. Pero, pag sila ay natapos ng ikasal ang totoong at kadalasan na masamang pag uugali ipinapakita na nya. 

Ang ganitong sitwasyon ay angkop na angkop din sa sitwasyon ng pakikipag kaibigan. Dapat hindi po tayo nakikipag kaibigan sa isang tao dahil siya ay mayaman o maykapangyarihan. Kailagan tayo ay nakikipagkaibigan dahil mabuti ang isang tao. Hindi na bale kung hindi siya mayaman o makapangyarihan basta ang importante ay ang nangagaling sa kanyang puso ay pawang kabutihan lamang.

Sa ating pong unang pagbasa ayon sa aklat ni Sirac ay ito ang sinasabi: Sa sinasabi naman ng tao nakikilala ang kanyang damdamin (Sirac 27:6). At sa ating mabuting balita ay ito ang sabi ni Jesus: “Sinasabi nga ng bibig ang umaapaw mula sa puso (Lucas 6:45).”

Ano po ang dapat nating gawin para hindi tayo mahulog sa patibong ng panlabas na kaanyuan? Dapat po ay lubusan muna nating makilala ang isang tao sa pamamagitan ng pakikipag usap sa kanya. At sa pamamagitan ng masusing pakikinig sa kanyang mga sinasabi.

Bago natin siya pagkatiwalaan. Dahil ang kanyang mga sinasabi ay nagmumula sa kanyang puso at ang nag mumula sa kanyang puso ang sukatan ng tunay nap ag-uugali ng isang tao. – Marino J. Dasmarinas