Kaya't patakbo siyang nagpauna at umakyat sa isang puno ng
sikomoro upang makita si Jesus na magdaraan doon. Pagdating ni Jesus sa dakong
iyon, siya'y tumingala at sinabi sa kanya, "Zaqueo, bumaba ka agad,
sapagkat kailangan kong tumuloy sa bahay mo." Nagmamadali siyang bumaba,
at tuwang-tuwang tinanggap si Jesus.
Lahat ng nakakita nito ay nagbulung-bulungan. "Nakikituloy
siya sa isang makasalanan," wika nila. Tumayo si Zaqueo at sinabi,
"Panginoon, ibibigay ko po sa mga dukha ang kalahati ng aking ari-arian.
At kung ako'y may nadayang sinuman, apat na ibayo ang isasauli ko sa
kanya." At sinabi sa kanya ni Jesus, "Ang kaligtasa'y dumating ngayon
sa sambahayang ito; lipi rin ni Abraham ang taong ito. Sapagkat naparito ang
Anak ng Tao upang hanapin at iligtas ang naligaw."
Si
Zaqueo ay isang tiwaling pinuno ng mga maniningil ng buwis, isang kilalang mapagsamantala,
at isang makasalanan. Kung pagbabatayan ang kanyang pamumuhay, maaaring isipin
nating mananatili na lamang siyang bihag ng kanyang mga kasalanan habambuhay.
Ngunit namagitan si Hesus sa kanyang buhay. Sa pamamagitan ng kanyang
pakikipagtagpo kay Hesus, nagsisi si Zaqueo, tinalikuran ang kanyang makasalanang
pamumuhay, at nagbago ang kanyang buhay.
Kumikilos
ang Diyos sa ating buhay sa mga paraang hindi natin laging nauunawaan. Patuloy
Niya tayong tinatawag, sa kabila ng ating pagiging makasalanan, upang talikuran
ang kasamaan at maging tapat Niyang mga tagasunod. Isa si Zaqueo sa mga taong
tinawag ng Panginoon—isang makasalanang tulad mo at tulad ko.
Maaaring
isipin nating sariling pagkukusa ni Zaqueo ang kanyang pagbabalik-loob, ngunit
hindi lamang iyon ang dahilan. Si Hesus ang unang tumawag sa kanya. Si Hesus
ang nangusap sa kanyang puso at nagbigay sa kanya ng lakas ng loob na magbagong
buhay at isauli ang perang kanyang kinuha sa pamamagitan ng panlilinlang at kasamaan.
Patuloy
tayong tinatawag ni Hesus sa pagbabalik-loob, at gumagamit Siya ng iba't ibang
paraan upang maabot ang ating mga puso. May mga pagkakataong ginugulo Niya ang
ating konsensya upang gisingin tayo sa katotohanan tungkol sa ating mga
kasalanan. May mga pagkakataon din namang gumagamit Siya ng ibang tao upang
akayin tayo palapit sa Kanya.
Kung
minsan, naririnig natin ang Kanyang panawagan sa pamamagitan ng mga salita ng
isang taong nagmamalasakit sa atin. Sa ibang pagkakataon naman, ginagamit Niya
ang mga pangyayari sa ating buhay upang pag-isipan natin kung tama pa ba ang
direksyong ating tinatahak.
Kaya't
maging sensitibo tayo sa mga banayad ngunit makapangyarihang pagkilos ni Hesus
sa ating buhay. Huwag nating ipagwalang-bahala ang Kanyang tinig kapag
tinatawag Niya tayong magbago at manumbalik sa Kanya.
Hindi
magiging ganap ang ating buhay kung ipamumuhay natin ito nang hiwalay kay
Hesus. Maaaring pansamantala nating matamasa ang mga bagay na iniaalok ng
mundong ito, ngunit sa huli, lahat ng ito ay lilipas at maglalaho.
Ang
kayamanan, mga ari-arian, kapangyarihan, at mga kaligayahang dulot ng
sanlibutan ay hindi makapagbibigay sa atin ng tunay at pangmatagalang
kapayapaan at kaganapan na tanging si Hesus lamang ang makapagkakaloob.
Pag-isipan
nating mabuti ang katotohanang ito. Gumising na tayo mula sa ating labis na
pagkakapit sa kasalanan at materyalismo habang may panahon pa upang talikuran
ang mga ito at manumbalik sa Diyos.
At
kapag tinalikuran na natin ang materyalismo at kasalanan, agad tayong lumapit
kay Hesus nang may mapagpakumbaba at nagsisising puso. Hayaan nating patawarin
Niya tayo, pagalingin ang ating mga sugatang kaluluwa, at panibaguhin ang ating
buhay, tulad ng ginawa Niya kay Zaqueo.
Tandaan
natin: gaano man kabigat ang ating mga naging kasalanan noon, hindi nagsasawa
si Hesus na tawagin tayong manumbalik sa Kanya. Higit na dakila ang Kanyang awa
kaysa sa ating mga kasalanan, at kayang baguhin ng Kanyang pag-ibig maging ang
pinakamatigas na puso.
Tulad ni Zaqueo, handa ba tayong papasukin si Hesus sa ating
buhay, talikuran ang ating mga kasalanan at labis na pagkakapit sa mga materyal
na bagay, at hayaan Siyang baguhin tayo ayon sa kalooban Niya? O patuloy pa rin
ba tayong kumakapit sa mga bagay na siyang naglalayo sa atin sa Kanya?
Kung tinatawag na tayo ni Hesus ngayon, bubuksan ba natin ang
ating puso at buong pagpapakumbabang sasabihin sa Kanya: Panginoon, narito po
ako. Baguhin Ninyo ang aking buhay?—Marino J.
Dasmarinas

No comments:
Post a Comment