Mabuting
Balita: Lucas 6:39-42
39 Sinabi
ni Jesus sa kanila ang isang talinhaga: “Puwede nga kayang akayin ng isang
bulag ang isa pang bulag? Di ba’t kapwa sila mahuhulog sa kanal? 40 Hindi higit
sa kanyang guro ang alagad. Magiging katulad ng kanyang guro ang ganap na
alagad. 41 Bakit mo tinitingnan ang puwing sa mata ng iyong kapatid? At di mo
pansin ang troso sa iyong mata. 42 Paano mo masasabi sa iyong kapatid:
‘Kapatid, pahintulutan mong alisin ko ang puwing sa mata mo,’ gayong hindi mo
nga makita ang troso sa mata mo? Mapagkunwari! Alisin mo muna ang troso sa mata
mo, at saka ka makakakitang mabuti para alisin ang puwing sa mata ng kapatid
mo.
+ + + + +
+ +
Repleksyon:
Ano po ba
ang siguradong paraan para hindi magtagumpay ang pagsasama ng mag asawa? Ito ay
ang pagiging mapanghusga at ang mataas na pagtingin ng mag asawa sa kanilang
mga sarili. Kung ang asawa ay madaling maghusga at kung siya ay nakikinig
lamang sa kanyang sarili. Siguradong sigurado na sa lalong madaling panahon ang
kanilang pagsasama mabubuwag.
Maraming
buhay ng mag asawa ang nasisira dahil sa
makasariling paningin ng mag asawa. Pinatatakbo nila ang kanilang relasyon ng
pagdodomina at ayaw nila na demokrasya sa loob ng kanilang buhay mag asawa.
Ang buhay
mag asawa ay buhay na mayroong demokrasya at ito ay pagsasama na mayroong
pagtutulungan at paguunawaan. Hindi kailanman ito naging pagsasama na mayroong
pagdodomina at pagmamataas. Kaya ang pinaka mabuting recipe para magtagumpay
ang buhay mag asawa ay ang iwasan ang maging mapanghusga. At magkaroon tayo ng
lakas ng loob na aminin ang ating mga pagkukulang.
Sa atin
pong mabuting balita ngayong biyernes si Jesus ay nagsasabi sa atin na dapat
tayo ay hindi madaling maghusga. Kung saan ay madali nating nakikita ang
kamalian ng ating kapwa pero ayaw naman nating aminin ang ating sariling
kamalian. Madali po nating ituro ang ating daliri sa pagkakamali ng ating
kapwa. Ngunit wala naman tayong lakas ng loob at pagpapakumbaba na ituro ang
ating mapanghusgang daliri sa ating mga sarili. – Marino J. Dasmarinas
No comments:
Post a Comment